Odne álggaha SVT Sápmi áibbas ođđa sámi ođassiiddu svt.se:as Visot guorahallamat čájehit ahte olbmot hálidit ođđasiid mátketelefovnnas. Ođđa siidu lea bures heivehuvvon mátketelefovnna vuogádahkii nu ahte olbmot sáhttet váldit oasi ođđasiin goasse ja dalle go hálidit.

SVT Sápmi, mii lea okta SVT:a doaimmahusain, ovddida ja čiekŋoda iežas fálaldaga sihke tv:as ja neahtas. Odne rahpasa ođđa sámi ođassiidu svt.se/nyheter/sapmi mii galgá fállat čiekŋodeaddji áššáigullevaš journalistihka sámiide gos ealli govva lea guovddážis.

Lea somá ja dehálaš sáhttit fállat min geahčiide digitála ođasfálaldaga gos govva duođas oččo saji. Doaimmahusa sávaldat lea ahte juohkehaš galgá beassat váldit oasi min ođđasiin, ii dušše ruoŧagillii, muhto maid buot sámegielaide. Dat mearkkaša ahte sámit ožžot vel stuorit public service-fáláldaga, dadjá Linda Hermansson, SVT Sámi sadjásas doaimmahushoavda.

SVT Sámis mas lea váldodoaimmahus Gironis ja mielbargit miehtá Ruoŧa joatká buvttadit ođasprográmma Ođđasat ovttas NRK:ain Norggas ja Yle:in Suomas. Doaimmahus joatká maid ovttasbarggu Ruoŧa Radio sámedoaimmahusain. Boáhtte áigodahkii plánejuvvojit 18 ođđa oasi čiekŋodeaddji ođasprogrammas “15 minuter från Sápmi”. Dát mearkkaša ahte sámit dal ožžot vel čiekŋalut sisdoalu gos ealli govva lea guovddážis.

Ođđa sámi ođassiidu lea oassi SVT:a unnitlogugielaid vuoroheamis mii siskkilda nannejuvvon ođasfálaldaga ja maid ahte almmuhit iežálágán prográmmaid.